O marzo máis seco deste século

Detalles

Luns, 12 Abril 2021

• Marzo de 2021 foi o cuarto máis seco desde o comezo da serie en 1961 e o máis seco do século XXI
• O último día do mes superáronse os 30º de máxima por primeira vez en 2021 na España peninsular e batéronse 11 récords cálidos, 7 de temperatura máxima diaria máis alta e 4 de temperatura mínima máis alta xamais rexistrada nun mes de marzo
• A pesar de todo, marzo foi un mes normal en temperatura e proba diso é que foi declarado o vixésimosegundo marzo máis cálido desde 1961 e o undécimo máis cálido deste século

A Axencia Estatal de Meteoroloxía (AEMET), dependente do Ministerio para a Transición Ecolóxica e o Reto Demográfico, acaba de publicar o balance climático mensual correspondente ao pasado mes, indicando que foi o cuarto marzo máis seco desde o comezo da serie en 1961, por detrás dos marzos de 1997, 1994 e 1996, e o máis seco deste século.

Concretamente, o pasado mes foi moi seco, cunha precipitación media sobre a España peninsular de 17 mm, o que supón un 37 % do valor normal do mes (período de referencia: 1981-2010).

Marzo foi húmido ou moi húmido no sueste da península e en Baleares, mentres que resultou seco ou moi seco no resto do territorio peninsular e en Canarias. A precipitación acumulada chegou a duplicar e mesmo triplicar o valor normal nalgúns puntos das costas de Alacante, Murcia e Almería. En contraste, a precipitación quedou por baixo do 25% do valor normal en amplas zonas de Galicia, metade sur de Castela e León, Estremadura, Aragón, interior de Andalucía e Canarias.

En canto a efemérides, na estación principal do aeroporto de Alacante-Elxe os 95 mm constituíron un novo récord de precipitación acumulada en marzo desde o comezo da serie en 1967.

11 RÉCORDS CÁLIDOS O ÚLTIMO DÍA DO MES

Marzo foi no seu conxunto normal, cunha temperatura media na España peninsular de 9,9º C. Isto é 0,1º C por encima da media deste mes (período de referencia: 1981-2010). Tratouse do vixésimosegundo marzo máis cálido desde o comezo da serie en 1961 e do undécimo máis cálido do século XXI.

O pasado mes foi frío ou moi frío no cuadrante sueste da península, resultando normal ou cálido no resto do territorio peninsular español. En Baleares tivo un carácter entre normal e frío, mentres que en Canarias predominou o carácter frío.

Observáronse anomalías térmicas negativas, próximas a -1º C, na maior parte da Comunitat Valenciana, Región de Murcia, sueste de Castela-A Mancha e extremo oriental de Andalucía. Pola contra, tomaron valores positivos próximos a +1º C en zonas de Galicia, cantábrico oriental, Pireneos e en puntos de Estremadura e da metade occidental de Andalucía. Nos arquipélagos de Baleares e Canarias as anomalías situáronse maioritariamente entre 0º C e -1º C.

As temperaturas máximas diarias quedaron en media 0,2º C por encima das normais, mentres que as mínimas situáronse 0,1º C por baixo do valor medio, resultando unha oscilación térmica diaria 0,3º C superior á normal do mes.

Resulta importante destacar que a partir do día 23 e ata o final do mes observouse un episodio cálido con temperaturas moi por encima das normais, chegándose a superar, o último día do mes, os 30º C en zonas de Estremadura e Andalucía e nalgúns puntos do cantábrico. Este episodio deu lugar a varias efemérides cálidas o 31 de marzo. En sete estaciones principais (Oviedo, Badaxoz/Talavera la Real, Pontevedra, Vigo/Peinador, Salamanca/Matacán, Valladolid e Zamora) a temperatura máxima rexistrada resultou a máis alta para un mes de marzo desde o comezo da serie, e en catro estaciones principais (o Aeroporto de Almería, o Observatorio de Cádiz, o Observatorio da Base Naval de Rota e Pontevedra) a temperatura mínima diaria máis alta rexistrada no mes resultou a maior para un mes de marzo desde o comezo da serie.


NOTA importante: En setembro de 2020 pasouse a utilizar como valores de referencia para a vixilancia do clima en España os valores medios no territorio peninsular español das reixas mensuais e anuais de temperatura e precipitación descritas nas notas técnicas 31 e 32 de AEMET (período de referencia: 1981-2010). Este cambio de metodoloxía pode dar lugar a diferenzas significativas cos resultados que se obtiñan a partir dos valores de referencia anteriormente utilizados.

NOTA: Os datos empregados para elaborar este avance climatolóxico son provisionais e están suxeitos a unha posterior validación.
© AEMET: Autorizado o uso da información e a súa reprodución citando AEMET como autora da mesma.

Descargar PDF