A Confederación do Miño-Sil mellora a capacidade de desaugadoiro dos ríos Gaiola, Lonia e Triós ao seu paso polo municipio de Pereiro de Aguiar (Ourense)

Detalles

Martes, 10 Marzo 2020

• Estas actuacións están incluídas nun dos contratos de mellora e restauración de leitos programados para 2020
• No primeiro trimestre do ano o investimento no río Lonia e os seus afluentes xa superará os 20.000 €

A Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, continúa os traballos de limpeza de ríos na provincia de Ourense.

Hoxe comezaron os traballos de limpeza de leitos e mellora da capacidade de desaugadoiro dos ríos Gaiola, Lonia e Triós ao seu paso polo municipio de Pereiro de Aguiar (Ourense); estas actuacións están incluídas no Encargo á empresa Tragsa para o Servizo de Conservación e Restauración de leitos da Demarcación Miño-Sil, que se prorrogarán ata setembro de 2020.

Da inspección previa ás zonas de actuación detectouse abundante vexetación arbórea e arbustiva e un importante número de árbores con risco de caída sobre os leitos o que dificulta o normal discorrer das augas, provocando inundacións nas leiras lindeiras.

Nun tramo concreto do río Lonia detectouse a presenza de varios tapóns (troncos e ramas) apoiados nas bases de 5 pontes ou infraestruturas de paso, o que mingua considerablemente a capacidade de desaugadoiro do río.

Características similares ao anterior están presentes no río Gaiola no que varios troncos e ramas inertes dificultan a circulación da auga en seis infraestruturas de paso.

Para solucionar esta problemática xeral, está a traballarse no acondicionamento e limpeza do leito en DPH e zona de servidume, especialmente nas inmediacións das infraestruturas de paso, a través da execución de rozas selectivas de matogueira perimetral, poda e clareo de ramas baixas, curta sanitaria e retirada de pés secos, caídos ou inclinados cara ao leito.

Estes traballos son executados por 1 brigada compostas por catro operarios especializados.

Os restos vexetais son retirados da zona e transpórtanse ao xestor autorizado; no caso dos amieiros, aplicaranse as medidas ou recomendacións profilácticas co obxecto de evitar a propagación de Phytophthora alni.

“Esta Encomenda finaliza en setembro 2020, aínda que, está a valorarse, do mesmo xeito que en 2019, un contrato complementario de reforzo que dea cobertura a un maior número de tramos con problemas, todo iso co ánimo de previr inundacións e avenidas que puidesen afectar as persoas e os seus bens” matizou José Quiroga, presidente da CHMS.

Descargar PDF