A CHMS mellorará o saneamento e depuración do municipio ourensán de Verea
- Detalles
- Martes, 27 Setembro 2022
- O investimento necesario estímase en 300.000 euros
- Procederase á adecuación, mellora e limpeza das 34 fosas sépticas coas que conta o municipio
- O obxectivo é a correcta depuración das verteduras de augas residuais urbanas, necesario para a regularización administrativa do sistema de saneamento
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e José Antonio Pérez Valado, alcalde de Verea, rubricaron o Protocolo de colaboración a través do que se adquire o compromiso para o financiamento, execución e entrega das actuacións de mellora do sistema de saneamento e depuración do municipio ourensán de Verea.
Neste momento existen 34 fosas sépticas conectadas aos seus respectivos sistemas cuxa situación técnica e administrativa é diversa; algunhas non contan con autorización de vertedura, outras dispoñen da mesma pero esta non se cumpre, ademais de problemas de funcionamento que provocan problemas de contaminación do medio acuático.
A colaboración da CHMS sería a adecuación, mellora e limpeza do sistema actual, a través da identificación dos problemas principais de cada fosa e a redacción do proxecto que resolva a situación, ademais da execución das melloras necesarias para a correcta depuración das verteduras, que permitan a regularización administrativa do sistema.
O investimento necesario estímase nuns 300.000 Euros, incluíndo o custo de redacción do Proxecto, a execución do contrato de obras, así como a dirección facultativa do mesmo.