CHMS colabora con ASPRONA Bierzo facilitando prácticas formativas que favorezan o acceso ao emprego das persoas con discapacidade intelectual
- Detalles
- Xoves, 19 Novembro 2020
- Hoxe rubricouse o Convenio que posibilita estas accións formativas non remuneradas
- “Desde este Organismo de conca queremos abrir as portas da Administración á formación de persoas con necesidades especiais, co ánimo de mellorar a súa calidade de vida e de complementar a súa formación para o acceso ao emprego” explicou Jose Antonio Quiroga
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, e Valentín Barrio, director de ASPRONA BIERZO, asinaron esta mañá un Convenio de colaboración que posibilitará a inserción Sociolaboral de persoas con discapacidade intelectual, a través da realización de prácticas formativas, non laborais, nas oficinas do Organismo de conca.
O obxecto deste Convenio é establecer fórmulas de colaboración conxunta no desenvolvemento de prácticas de formación nas oficinas da CHMS en Ponferrada por persoas con discapacidade intelectual dentro do Programa de Itinerarios Personalizados que a organización ASPRONA BIERZO está a desenvolver.
As prácticas terán un carácter exclusivamente formativo e, en consecuencia, as mesmas non poderán comportar o desenvolvemento de tarefas propias do persoal funcionario ou laboral deste organismo ou centros adscritos.
O contido das prácticas así como as condicións de realización no que se refire ao número de participantes, duración e horario acordarase polos titores de ambos os organismos e plasmarase nun documento específico que acompaña a este convenio, cuxa validez é de catro anos.
“Desde este Organismo de conca queremos abrir as portas da Administración á formación de persoas con necesidades especiais, co ánimo de mellorar a súa calidade de vida e de complementar a súa formación para o acceso ao emprego” explicou Jose Antonio Quiroga.
