O proxecto de pasarela peonil de Ponte Ribeira conta co visto e prace da CHMS e foi sometido a Información Pública
- Detalles
- Venres, 19 Xuño 2020
- Esta mañá Quiroga e Garrido mantiveron un encontro no que corroboraron o interese de ambas as Institucións polo patrimonio natural e cultural
- Quiroga comprometeuse a elaborar un estudo que permita a rehabilitación da parte alterada hai anos para deixar á vista a fábrica orixinal da histórica ponte Medieval de Ponte Ribeira
José Antonio Quiroga, presidente da Confederación Hidrográfica do Miño-Sil (CHMS), Organismo autónomo dependente do Ministerio para a Transición Ecolóxica e o Reto Demográfico, reuniuse co alcalde de Sarria, Claudio Garrido, para tratar, entre outros asuntos, o avance dos trámites administrativos tendentes a conseguir a Autorización para executar o proxecto de “Pasarela metálica provisional para Ponte Ribeira”, que dará continuidade ao traxecto orixinal do Camiño de Santiago.
O proxecto atópase en Información Pública e pode ser consultado nas oficinas da CHMS en Lugo, tal e como publica o BOP de Lugo o 12 de xuño de 2020.
Neste encontro corroborouse o compromiso de ambas as Institucións coa riqueza natural da zona e o arraigamento dos Sarriáns, desde hai séculos, ao tránsito de peregrinos que cruzan a vila para continuar o traxecto do Camiño Francés ata completar o Camiño de Santiago.
Neste mesmo sentido, Quiroga comprometeuse a elaborar un estudo que permita a rehabilitación da parte alterada da ponte medieval para deixar á vista a fábrica orixinal desta histórica ponte de “Ponte Ribeira”. “Temos que ser conscientes do patrimonio cultural asociado ao mundo da auga do que dispoñemos en Galicia e, por iso, desde a CHMS apostamos por manter as vías orixinais sen obviar a normativa de augas” matizou o presidente.
“É importante destacar o prexuízo que supuxo para os veciños de Sarria, para os peregrinos e para os comerciantes da zona, o corte da circulación pola ponte do Peregrino –Ponte Ribeira- e desde a CHMS tentaremos que as obras se poidan executar o máis axiña posible para evitar, na medida do posible, máis inconvenientes aos prexudicados” concluíu Quiroga.