A Confederación do Miño-Sil traballa na estabilización dos noiros danados polas crecidas do Miño na zona termal
- Detalles
- Xoves, 27 Abril 2017
- O presidente da CHMS, Francisco Marín, acompañado polo alcalde de Ourense, Jesús Vázquez, supervisaron esta mañá a boa marcha dos traballos
- A reparación execútase mediante técnicas de bioenxeñería e sementa de herbáceas que axudan á estabilización
A Confederación Hidrográfica do Miño-Sil (CHMS), organismo autónomo dependente do Ministerio de Agricultura e Pesca, Alimentación e Medio Ambiente, traballa na reparación dos noiros situados na zona termal entre a Chavasqueira e O Tinteiro afectados polo intenso caudal circulante do Miño na primavera de 2016.
Esta mañá o presidente do organismo, Francisco Marín, e o alcalde de Ourense, Jesús Vázquez, acompañados dos concelleiros de Termalismo, Medio Ambiente e Participación Cidadá, supervisaron a boa marcha dos traballos.
As obras en execución consisten no acondicionamento dos noiros mediante técnicas de bioenxeñería, utilizando malla orgánica composta ao 50% por palla e coco, cosida en ambas as caras a unha rede de polipropileno biodegradable. Previamente, estes noiros foron perfilados para dotalos dunha pendente uniforme e constante.
Unha vez finalizados os traballos de colocación da malla orgánica procederase a realizar unha sementa de herbáceas que axuden na estabilización e protección a longo prazo.
Estas actuacións, que finalizarán o próximo 26 de maio, supoñen un investimento próximo aos 25.000 euros.
O Concello de Ourense solicitou o apoio da administración hidráulica co ánimo de mellorar o estado da zona para que turistas e aldeáns poidan gozar da importante riqueza termal da cidade.
"A colaboración entre as distintas Administracións é básica á hora de optimizar os recursos dispoñibles e de dar ao cidadán un servizo público de calidade", concluíu, Francisco Marín, presidente da CHMS.
